3-TEMA
INTERAKTIV DOSKANI SAZLAW, DÚZILISI HÁM OQIW PROCESSINDE QOLLANILIWI
Oqıw hám prezentaciyalar ushın úskeneler arasında bólek orındı interaktiv doska iyeleydi. Bul proektor menen baylanısqan hám kompyuter tárepinen basqarılatuǵın sensorlı ekran. Onda súwret sızıladı, maǵlıwmat usınıladı, saytlar kórip shıǵıladı, esletpeler saqlanadı hám óz ara bólisiledi. Interaktiv doska ne ushın kerekligin, onı kompyuter yamasa noutbuk arqalı qanday jalǵaw hám sazlawdı kórip shıǵamız.
Mektepte interaktiv doskadan paydalanıw
Bul oqıwshılardıń dıqqatın tartadı hám materialdı eslep qalıwǵa járdem beredi. Zamanagóy áwlad informaciyanı vizual tárzde alıwǵa ádetlengen. Xabar jáne de kózgizbeli boladı hám oqıwshılar arasındaǵı pikir alamasıwlarǵa alıp keledi. Oqıtıwshılar ózleriniń oqıwshılarınıń jasına qaray jańa tálim usılların jaratıwları, sonıń menen birge, tiyisli maǵlıwmatlardı tabıwları, redaktorlawları hám saqlawları múmkin.
    Oqıwshılardıń úzliksiz jumıs islew waqtı :
  • 1-4 klaslarda 5 minutadan aspawı kerek.
  • 5-11-klaslarda - 10 minutadan.
Interaktiv doskanı ornatıw : Jalǵanıw hám sazlaw

Eger siz ekrandı ózińiz ornatıwǵa qarar qılsańız, onı eki adam bolıp islew ańsatlaw. Siz onı tómendegi materiallardan islengen diywalǵa ornatıwıńız múmkin:

  • Gerpish.
  • Metall.
  • Qurılıs gipsi.
  • Gipsokarton.
  • Shlakabeton tas.

Interaktiv doskanıń túri onı qanday ornatıw hám sazlawdı anıqlaydı. Magnit bekkemlegish metall yamasa metal-keramika markerlı taxtasına magnitlenedi. Eger ID qosımsha jumıs maydanına iye bolsa, ol jaǵdayda qosımsha maydannıń ornatılıwı tiykarǵı oraylıq bólekti bekkemlegennen keyin ámelge asırıladı.

    Doskanı tuwrı ornatıw ushın sizge kerek boladı :
  1. Biyiklikti tuwrı saylań. Mısalı, mektep ushın ornatıw 70-90 sm biyiklikte ámelge asırıladı.
  2. Doska ushın bekkemlegishti hám proektor ushın kronshteyn ornatıń.
  3. Úskeneni ildiriń.

Bunnan tısqarı, ekran shtangalı tiregishke ornatılıwı múmkin. Sonday etip, úskene mobil bolıp, bul ańsat hám tez bir xanadan ekinshi xanaǵa kóshiriledi.

  • Smartboard Notebook programmalıq támiynattı(PT) júklep alıń hám ekrandı jeke kompyuter yamasa noutbukge jalǵań.
  • Programmanı ashıń. Bul sizge doskanı basqarıw, sabaqtı joybarlaw hám esletpelerdi saqlawǵa járdem beredi.
  • Siz ekrandı proektorga jalǵawıńız jáne onı qosıwıńız múmkin. Siz Smartboard arqalı kiresiz. Siz onı ashıwıńız hám kórsetpelerge ámel etiwińiz kerek.
  • Keyin ınteraktiv doskanı kalibrlaw kerek:
  • Kompyuter degi tiykarǵı menyu belgisin basıń hám kalibrlaw punktin saylań (калибровка, ориентация).
  • Arnawlı pero menen ekranda payda bolǵan belgige tiygiziń.
  • Sonıń menen birge, qosımsha programmalardı ornatıwıńız hám olardı Smartboard Notebook járdeminde ashıwıńız múmkin.
Interaktiv doskadan paydalanıw

Kóplegen paydalanıwshılar bul úskeneniń keń funktsional múmkinshiliklerinen xabardar emes. Haqıyqattan da olar jumıstı ápiwayılastırıwı hám hátte qızıqlı etiwi múmkin.

Qol menen basqarıw. Doska kursorın qosıw ushın barmaǵıńızdı ekranǵa basıń hám keyin basqa funksiyalar qanday islewin tekseriń.

  • Fayldı ashıw ushın onı eki ret basıń.
  • Tıshqanshanıń oń tuymesin basıw ushın barmaǵıńızdı basıp turıń.
  • Belgini kerekli jayǵa kóshiriw ushın barmaǵıńızdı belgi ústinde bir múddet ustap turıń.

Formatlaw panelinen paydalanıw. Kóbinese siz onı ekrannıń joqarı bóleginde yamasa Smartboard Notebook programmasınan tabıwıńız múmkin. Bul jerde túymesheler bolıp olar arnawlı instrumentke juwap beredi yaki «Сохранить», «Ножницы», «Отменить» h.t.b. funkciyalarǵa juwap beredi.

Pero. Úskene astındaǵı arnawlı latokta perolar bolıp, olar járdeminde ápiwayı doskadaǵı sıyaqlı ınteraktiv ekranda jazıw hám sızıw múmkin. Eger siz jazıwdı tamamlaǵan bolsańız hám jazıw rejiminen shıǵıwıńız kerek bolsa, qálemdi jayına qoysańız jetkilikli.

Jumıstı saqlaw. Hámme zattı kompyuterińizda qaldırıw ushın «Сохранить файл»dı saylań. Skrinshot alıw ushın kamera belgisin basıń. Ol avtomat túrde ekran suwretin saqlaydı.

Lastikten paydalanıw. Tap sol latokta jazılǵan tekstti óshiriw ushın lastik bar. Islew principi ápiwayi óshirgishten parqlanbaydı.

Noutbuk arqalı kompyuter programmaların kórsetiw. Ekrannıń joqarı shep múyeshindegi ashılatuǵın «открыть» tuymesin basıń hám keyin fayldı saylań.

Jumıs ushın 5 paydalı máslahát
  1. Elektron doska ǵamxorlıqtı talap etedi. Shıyshe tazalaǵısh yamasa spirtsız salfetkalar járdeminde ekrannıń betin shań hám basqa pataslantıratuǵın elementlerden tazalaw ańsat. Biraq onnan aldın ekrandı óshiriw shárt
  2. Elektron ekrannan birinshi ret paydalanıp atırǵan bolsańız, aldın shınıǵıw islegenińiz maqul.
  3. Jumıs islep bolǵannan keyin programmadan shıǵıń, usınıń menen siz maǵlıwmatlarıńızdı saqlap qala alasız.
  4. Kalibrovkanı ayına bir márte islegen maqul, mudamı paydalanıw nátiyjasinde balans joytılmawı ushın.
  5. Jumıs islewden aldın barlıq programmalardı jabıw usınıs etiledi.
Soraw hám tapsırmalar

1. Interaktiv doskanıń ápiwayı doskadan abzallıǵı nede

2. Interaktiv doskanı qol menen basqarıw qanday ámelge asırıladı

3. Interaktiv doskada formatlaw panelinen paydalanıw

4. Peronıń atqaratuǵın xızmeti

5. Jumıstı saqlaw qanday ámelge asırıladı

6. Lastikten paydalanıw qanday ámelge asırıladı

7. Noutbuk arqalı kompyuter programmaların kórsetiw qanday ámelge asırıladı